सुनकोशी न्युज
२०७७ मंसिर ३० गते मंगलबार
काठमाण्डौं । मंगलबार बसेको संवैधानिक परिषदको बैठकमा पर्याप्त छलफल र गृहकार्य हुन नसक्दा अनुपस्थित रहेनु परेको सभामुख अग्नी प्रसाद सोपकोटाको सचिवालयले जनाएको छ । सामाजिक संजालमा एक प्रेस नोट लेख्दै सभामुख सापकोटाका प्रेस सल्लाहकार श्रीधर न्यौपानेले उक्त कुरा बताएका हुन् ।
दूरगामी महत्वका विषयमा निर्णय लिनुपर्ने भएकाले संवैधानिक परिषदमा प्रमुख प्रतिपक्षी दलका नेता, सभामुख लगायतको सहभागिता र पार्टीमा पर्याप्त छलफलपछि मात्रै बैठक बस्नुपर्ने बारे प्रधानमन्त्रीलाई सभामुखले सुझाव दिएको तर प्रधानमन्त्रीले हठात अध्यादेश ल्याएर असंवैधानिक कदम चालेको न्यौपानेले उल्लेख गरेका छन् । जनताबाट निर्वाचित सार्वभौम संसदप्रति सभामुख सदैव सचेत र इमानदार रहने उनको भनाई छ ।
न्यौपानेले लेखेको प्रेस नोट यस्तो छ :
सम्माननीय सभामुखको सचिवालय
प्रतिनिधिसभा, संघीय संसद
प्रेस नोट
संवैधानिक परिषद्को मिति २०७७ साल मंसिर २८ र ३० गतेको बैठकमा सम्माननीय सभामुख अग्निप्रसाद सापकोटाको अनुपस्थितिलाई लिएर उठेका प्रश्न स्पष्ट पार्न यो प्रेस नोट जारी गरिएको छ ।
मंसिर २८ गते संघीय संसद सेवा दिवस २०७७ को पूर्वनिर्धारित कार्यक्रम अन्तरगत विहान ८ ः ३० बजे संघीय संसद, सचिवालय सञ्चालन तथा व्यवस्थापन समितिको बैठक स्वयम् सभामुखले अध्यक्षता गर्नुभएकोले उपस्थित हुन नसक्नु भएको यस अघि नै जानकारी गराइसकिएको छ । स्मरण रहोस्, त्यस दिन विहान ९ बजे परिषद् बैठकमा उपस्थितिका लागि पत्राचार गरिएको थियो ।
जहाँसम्म आज (मंसिर ३० गते) को संवैधानिक परिषद् बैठकमा अनुपस्थित भएको विषय छ, यसमा सम्माननीय सभामुखज्यूले बैठकको पूर्वतयारी, गृहकार्य, आपसी परामर्श र आवश्यक समन्वय अभावका सम्बन्धमा सम्माननीय प्रधानमन्त्रीज्यूलाई जानकारी गराउनु भएको थियो । राज्य संचालनमा दीर्घकालनीन एवं दुरगामी महत्व राख्ने निर्णयमा संवैधानिक परिषदका सदस्यहरुबीच पर्याप्त गृहकार्य र समन्वय हुनुपर्छ भन्ने उहाँको स्पष्ट मान्यता छ ।
नेपालको संविधान, संविधानले निर्दिष्ट गरेको विधिको शासन, शक्ति पृथकिकरण र सन्तुलनको सिद्धान्तलाई यहाँनेर स्मरण गर्नु उपयुक्त हुन्छ । राज्यका तीन अङ्ग कार्यपालिका, व्यबस्थापिका र न्यायपालिकाका प्रमुख र प्रतिनिधि सभाको विपक्षी दलको नेता समेत सहभागी रहने संवैधानिक परिषदको बैठकले लिने निर्णयले दुरगामी महत्व राख्छ भन्ने विषयलाई सम्माननीय सभामुखज्यूले गहिरोसँग आत्मसात गर्नु भएको छ ।
उहाँले संसदलाई जीवन्त र जनमुखी बनाउने सूत्र वाक्यलाई हृदयङ्गम गरि जननिर्वाचित सर्बोच्च निकाय संघीय संसदको गरिमालाई माथि उठाउने विषयलाई सदैब जोड दिँदै आउनु भएको छ । जनतामा निहित सार्वभौमसत्ताको अभ्यास गर्ने थलो, संघीय संसद प्रतिनिधि सभाको सभामुखमा निर्विरोध निर्वाचित भएदेखि उहाँले निष्पक्ष र तटस्थ रुपमा आफ्नो जिम्मेवारी निर्वाह गर्दै आउनु भएको अवगत नै छ ।
उहाँ संघीय संसदको गरिमा कायम राख्दै संवैधानिक परिषदको मर्यादा र जिम्मेवारीप्रति सदैब सचेत हुनुहुन्छ ।
श्रीधर न्यौपाने
२०७७ मंसिर ३०
Add Comment