कास्कीबाट चुनाव लड्न वामदेवलाई प्रधानमन्त्री ओलीकै प्रस्ताव !

के प्रधानमन्त्रीले आलोचकलाई फकाउने रणनीति लिएका हुन् ? 

पछिल्लो समय ओली गौतमप्रति उदार बन्दै गएका छन् । केही दिन अगाडि नेकपामा संगठन विभागको जिम्मेवारीका विषयमा पनि ओलीले लचकता देखाएका थिए । यसै शिलशिलामा प्रधानमन्त्री ओलीले गौतमलाई कास्कीबाट चुनाव लड्न प्रस्ताव गरेका हुन् । यस विषयमा प्रतिक्रिया लिन खोज्दा नेता गौतम सम्पर्कमा आएनन् ।

रवीन्द्र अधिकारीको निर्वाचन क्षेत्र कास्कीमा कतिपयले उनकै पत्नीलाई चुनाव लडाउन पनि प्रस्ताव गरेका छन् । तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीको विस २०७५ फागुन १५ गते ताप्लेजुङमा भएको हेलिकप्टर दुर्घटनामा निधन भएको थियो ।

यसैबीच निर्वाचन आयोगले शुक्रबार एक विज्ञप्ती जारी गर्दै विभिन्न कारणले रिक्त भएका स्थानमा आगामी मङ्सिर १४ गते उपनिर्वाचन गर्ने जनाएको छ ।

निर्वाचन आयोगले तोक्यो मंसिर १४ गते उपनिर्वाचन

आयोगका अनुसार उपमहानगरपालिका प्रमुख एक, गाउँपालिका अध्यक्ष तीन, गाउँपालिका उपाध्यक्ष एक, गाउँपालिका तथा नगरपालिकाका वडाध्यक्ष ४१, प्रदेशसभा सदस्य तीन र प्रतिनिधिसभा सदस्य एक गरी कूल ५० पदका लागि उपनिर्वाचन हुनेछ । मिति तोकिएसँगै उपनिर्वाचनको तयारी थालिएको आयोगले विज्ञप्ति मार्फत जानकारी गराएको छ ।

स्थानीय तह निर्वाचन ऐन २०७३ बमोजिम स्थानीय तहको उपनिर्वाचनको मिति निर्वाचन आयोगको परामर्शमा नेपाल सरकारबाट र प्रतिनिधिसभा सदस्य निर्वाचन ऐन २०७४ र प्रदेशसभा सदस्य निर्वाचन ऐन २०७४ बमोजिम प्रतिनिधिसभा तथा प्रदेशसभा सदस्यको उपनिर्वाचनको मिति आयोगले तोक्ने प्रावधान छ । यसअघि बुधबार आयोगले प्रधानमन्त्रीसँग उपनिर्वाचनको बारेमा परामर्श लिएको थियो भने बिहीबार राजनीतिक दलहरूसँग छलफल गरेको थियो ।