सुनकोसी न्यूज
जेष्ठ १ गते, शुक्रबार
काठमाडौं । साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचकमा सामान्य सुधार देखिएको छ। नेप्से परिसूचक १.७७ अंक अर्थात् ०.०६ प्रतिशतले बढेर २,७३१.९४ विन्दुमा पुगेको हो।
सेक्टरवाइज अवस्था
आज नेप्सेका १३ उपसूचकमध्ये ७ वटा समूहमा वृद्धि भएको छ भने ६ वटा समूहमा गिरावट आएको छ। बजारमा हाइड्रोपावर, विकास बैंक, वित्त, लगानी र व्यापार समूहमा सामान्य हरियाली देखिएको छ।
यस्तै बैंकिङ, बीमा, होटल तथा पर्यटन, उत्पादन तथा प्रशोधन लगायतका केही समूहमा सामान्य गिरावट आएको छ। कुनै पनि सेक्टरमा भने एक प्रतिशतभन्दा बढी उतारचढाव देखिएको छैन।
३ अर्बभन्दा बढीको कारोबार
शुक्रबार ३ सय ३८ कम्पनीका ७९ लाख ३४ हजार ४४ कित्ता सेयर किनबेच भएका छन्। दिनभर ४३ हजार ६ सय ७४ कारोबारमार्फत ३ अर्ब ९ करोड ७९ लाख ५३ हजार ४ सय ८६ रुपैयाँ बराबरको कारोबार भएको नेप्सेले जनाएको छ।
सेन्सेटिभ इन्डेक्स ०.३४ अंकले बढेर ४६७.५५ पुगेको छ भने फ्लोट इन्डेक्स ०.०४ अंकले बढ्दै १८५.३५ मा कायम भएको छ। सेन्सेटिभ फ्लोट इन्डेक्स पनि ०.०९ अंकले बढेर १५७.४९ पुगेको छ।
सर्वाधिक कारोबार र नाफा
कारोबार रकमका आधारमा यूनियन हाइड्रोपावर लिमिटेड शीर्ष स्थानमा रह्यो। कम्पनीको ३० करोड ६६ लाख ४९ हजार रुपैयाँभन्दा बढीको कारोबार भएको छ।
त्यसपछि अपी पावर कम्पनीको ११ करोड ४४ लाख रुपैयाँ र रिलायन्स स्पिनिङ मिल्सको ८ करोड ६३ लाख रुपैयाँ बराबरको कारोबार भएको छ।
आज नबिल डिबेन्चर २०८९ का लगानीकर्ताले सर्वाधिक ७.७१ प्रतिशत नाफा कमाएका छन्। मोदी इनर्जी लिमिटेड र राष्ट्रिय बीमा कम्पनी लिमिटेडका लगानीकर्ताले पनि उल्लेख्य लाभ कमाएका छन्।
घट्ने कम्पनी
आज यूनियन हाइड्रोपावरको सेयर मूल्य ७९ अंकले घटेको छ भने क्रेस्ट माइक्रोलाइफ इन्स्योरेन्सको सेयर मूल्य ७० अंकले घटेको छ।
Add Comment