अहिले प्रधानमन्त्री एवं नेकपा अध्यक्ष ओली उपचारको शिलशिलामा सिंगापुर छन् । प्रधानमन्त्री उपचारका लागि भदौ ५ गते सिंगापुर जानुभन्दा केही घण्टा अगाडि त्यसै दिन बसेको नेकपाको सचिवालय बैठकले अर्का अध्यक्ष प्रचण्डको अध्यक्षतामा बैठक बसि सांगठनिक एकता र अन्य निर्णयहरू गर्ने सहमति भएको थियो । सोही निर्णय अनुसार प्रचण्डले सोमबार बैठक बोलाएका हुन् ।
भोली बस्ने बैठकले महानगर कमिटीका पदाधिकारी, प्रवास र केही आयोगका प्रमुख उपप्रमुख टुंग्याउने भएको छ । पार्टीमा कार्यकारी अधिकार पाएसँगै अध्यक्ष प्रचण्डले अन्य तहका नेताहरुसँग पनि भेटघाट र छलफल गरेका छन् । आईतबार बिहान राष्ट्रपति विद्यादेवी भण्डारी र अध्यक्ष प्रचण्डबीच भेटवार्ता भएको थियो । भेटमा राष्ट्रपति भण्डारीले दुई अध्यक्ष मिलेर अगाडि बढ्न सुझाएकी छन् ।
यस्तै वरियता घटुवामा परेर असन्तुष्ट बनेका वरिष्ठ नेता माधवकुमार नेपालसँग शुक्रबार आफ्नै निवास खुमलटारमा भेटवार्ता गरेका थिए । यस्तै भदौ १ गते बसेको सचिवालय बैठकले हालसम्म तेस्रो वरियतामा रहेका नेता नेपाललाई चौँथो वरियता र चौथो वरियतामा रहेका नेता झलनाथ खनाललाई तेस्रो वरियतामा ल्याउने निर्णय गरेको थियो । सो निर्णयसँगै नेता नेपाल असन्तुष्ट बनेका छन् । उनले आफ्ना असन्तुष्टि लिखितरुपमै सचिवालयमा दर्ज समेत गराइसकेका छन् ।
नेता वामदेव गौतमलाई पार्टी उपाध्यक्ष बनाउने निर्णय गरेसँगै नेता नेपालले तत्कालीन एमालेका तीन उपाध्यक्ष युवराज ज्ञवाली, अष्टलक्ष्मी शाक्य र भीम रावललाई पनि सचिवालयमा ल्याउनुपर्ने माग पनि गरेका छन् । तर, नेता नेपालको मागलाई अर्का अध्यक्ष ओलीले ठाडै अस्वीकार गरिदिएका थिए ।
Add Comment