सुनकोसी न्यूज
चैत १५ गते आइतबार
काठमाडौं। नेपाली कांग्रेसका नेता तथा पूर्व ऊर्जामन्त्री दीपक खड्का पक्राउ परेका छन्। सम्पत्ति शुद्धीकरणसम्बन्धी मुद्दामा अनुसन्धानका क्रममा उनलाई नियन्त्रणमा लिइएको स्रोतले जनाएको छ।
नेपाल प्रहरीको केन्द्रीय अनुसन्धान ब्युरो (सीआईबी) स्रोतका अनुसार खड्कामाथि आर्थिक कारोबार र सम्पत्ति सम्बन्धी गतिविधिहरूको विस्तृत छानबिन भइरहेको छ। उनी लैनचौरस्थित नेपाल स्काउट को जग्गा विवादमा समेत मुछिएका छन्।
जेनजी आन्दोलनका क्रममा खड्काको निवासमा आगजनी हुँदा ठूलो मात्रामा नगद उडेको देखिने भिडियो सार्वजनिक भएपछि उनीमाथि अनुसन्धानको माग तीव्र बनेको थियो। त्यसपछि केही समय उनी सम्पर्कविहीन समेत भएका थिए।
राजनीतिक पृष्ठभूमि
खड्का २०७९ सालको निर्वाचनमा संखुवासभाबाट प्रतिनिधिसभा सदस्य निर्वाचित भएका थिए। २०८० सालमा कांग्रेस सभापति शेरबहादुर देउवा ले उनलाई आमन्त्रित केन्द्रीय सदस्यमा मनोनित गरेका थिए। उनी ऊर्जा, जलस्रोत तथा सिँचाइ मन्त्रीसमेत भइसकेका छन्।
उनको कार्यकालमा कुलमान घिसिङ सँगको विवाद निकै चर्चामा आएको थियो। प्राधिकरणभित्र ‘मन्त्री कार्यकक्ष’ निर्माणदेखि लिएर नीतिगत निर्णयसम्ममा दुबैबीच मतभेद देखिएको थियो।
स्काउट जग्गा विवाद
लैनचौरस्थित स्काउटको जग्गा भाडामा लिएर प्रयोग गरे पनि भाडा नतिरेको आरोप खड्कामाथि लागेको थियो। नेपाल स्काउट ले ५ करोड ४१ लाख रुपैयाँ भाडा असुल गर्न सरकारसँग सहयोग मागेको थियो।
गत कात्तिकमा भाडा तिर्न सूचना जारी गरिएको र म्याद सकिएपछि काठमाडौं महानगरपालिकाले संरचना भत्काएको थियो। त्यसबेला महानगर प्रमुख बालेन शाह थिए।
थप अनुसन्धान जारी
खड्काको पक्राउसँगै सम्पत्ति शुद्धीकरण, जग्गा प्रयोग र राजनीतिक प्रभावसम्बन्धी विषयमा थप अनुसन्धान अघि बढाइएको प्रहरीले जनाएको छ।
यस घटनाले वर्तमान राजनीतिक वृत्तमा तरंग सिर्जना गरेको छ भने आगामी दिनमा थप खुलासा हुने अपेक्षा गरिएको छ।
Add Comment