🎬 रणवीर सिंहको ‘धुरन्धर २’ को बक्स अफिसमा तहल्का, पहिलो सप्ताहन्तमै ऐतिहासिक कमाइ

सुनकोसी न्यूज

चैत्र ९ गते सोमबार

काठमाडौं | बलिउड स्टार रणवीर सिंह अभिनीत फिल्म ‘धुरन्धर २ (धुरन्धर द रिभेन्ज)’ ले प्रदर्शनको पहिलो सप्ताहन्तमै बक्स अफिसमा ऐतिहासिक कमाइ गर्दै नयाँ रेकर्ड कायम गरेको छ।

फिल्मले प्रदर्शनको चार दिनमै भारतीय बक्स अफिसमा करिब ३८३ करोड भारू नेट कमाइ गरेको छ भने कुल कलेक्सन ४ सय करोडको हाराहारीमा पुगेको जनाइएको छ।

भारतीय मनोरञ्जन पोर्टल Pinkvilla का अनुसार, फिल्मको हिन्दी संस्करणले आइतबार मात्रै १०१ करोड भारू नेट कमाइ गर्दै बलियो उछाल देखाएको हो। चार दिनको यो कमाइले बलिउडमा यसअघि Jawan ले बनाएको रेकर्डलाई समेत उछिनेको बताइएको छ।

शनिबारदेखि दक्षिण भारतीय भाषामा डब गरिएका संस्करणहरू समेत प्रदर्शनमा ल्याइएपछि फिल्मको कमाइ थप बढेको छ। ती संस्करणहरूले दुई दिनमै करिब १५ करोड भारू नेट कमाएका छन्।क्षेत्रगत रूपमा हेर्दा गुजरात, मध्य भारत लगायतका क्षेत्रमा आइतबार उल्लेखनीय वृद्धि देखिएको छ भने मुम्बई, राजस्थान, बिहार र पश्चिम बंगालमा पनि दर्शकको राम्रो साथ पाइएको भारतीय सञ्चारमाध्यमले जनाएका छन्।

फिल्मले पेड प्रिभ्यूबाट ३९.५० करोड भारू कमाएको थियो। त्यस्तै, बिहीबार ७५ करोड, शुक्रबार ७१.५० करोड र शनिबार ९६ करोड भारू कमाइ गरेको विवरण सार्वजनिक गरिएको छ।आदित्य धर को निर्देशनमा बनेको यस स्पाइ–एक्सन थ्रिलरमा रणवीर सिंहले अन्डरकभर एजेन्टको भूमिका निर्वाह गरेका छन्। फिल्ममा आर माधवन, अर्जुन रामपाल, संजय दत्त, सारा अर्जुन र राकेश बेदी लगायत कलाकारको अभिनय रहेको छ।

फिल्मले नेपालमा समेत उत्साहजनक प्रदर्शन गरिरहेको छ।