सुनकोशी न्युज, २०७६ पौष २६ गते शनिवार
नेत्रबिक्रम चन्द ‘विप्लव’ले नेतृत्व गरेको नेकपाका पोलिटव्यूरो सदस्य मोहन कार्की ‘जिवन्त’ आफ्नो पुरानै माउपार्टी नेकपामा फर्किनुभएको छ । आज नेकपा केन्द्रीय कार्यालय धुम्बराहीमा आयोजित पार्टी प्रवेश कार्यक्रममा उहाँले नेकपामा पार्टी प्रवेश गर्नुभएको हो ।
धुम्बराहीमा आयोजित कार्यक्रममा अध्यक्ष पुष्पकमल दाहाल ‘प्रचण्ड’ ले जिवन्तलाई खादामाला र अबिर लगाएर पार्टी प्रवेश गराउनुभएको हो । महासचिव विष्णु पौडेल, स्थायी समिति सदस्यहरु अग्नी सापकोटा, देवेन्द्र पौडेल, हितमान शाक्य, केन्द्रीय सदस्य बलावती शर्मा लगायतको 
समुपस्थितिमा आयोजित समारोहमा पार्टी प्रवेश कार्यक्रम सम्पन्न भएको हो ।
कार्यक्रममा अध्यक्ष प्रचण्डले बिगतमा विभिन्न बहानामा पार्टीबाट काहिरिएका सबै नेता–कार्यत्रर्ता समयक्रमसँगै पार्टीमा फर्किने बताउनुभयो । उहाँले अलग्गै चुलो बाल्ने साथीहरुले अब यसरी हुदैन भन्ने बुझिसकेकाले मूलपार्टीमा समाहित भएर पार्टी र देशको समृद्धिका लागि काम गर्नुपर्ने बेला आएको र त्यो सबैले महसुस गरिसकेको बताउनुभयो ।
जिवन्त जस्ता जनयुद्धको अग्रमोर्चामा रहेर काम गरेका सबै नेताहरु अब एकीकृत भएर राष्ट्रिय समृद्धिका लागि अर्को मोर्चा लड्नुपर्ने बताउनुभयो ।
Add Comment