म्याग्दी । मार्फा गाउँ घुम्न जाने पर्यटकको वृद्धि भएको छ। मुस्ताङको घरपझोङ गाउँपालिका–२ मा रहेको मार्फा घुम्न पर्यटकको रोजाईमा परेको हो ।
मार्फाको एकैनासको घरको बाक्लो बस्तीबीचको पदमार्गमा पर्यटकहरू बिहानदेखि साँझसम्म तस्बिर र भिडियो खिचेर रमाइरहेको भेटिन्छन्। स्याउको राजधानीका रूपमा परिचित मार्फा पछिल्लो समय पर्यटकको रोजाइमा परेको छ । दुुई÷तीन वर्षअघिसम्म छिटपुुट पर्यटक आउने मार्फामा चलचित्र जेरी र कबड्डी छायाङ्कन भएपछि पर्यटकको पनि चहलपहल बढेको हो,’ स्थानीय चन्द्रमान भट्चनले भने, ‘बेनी–जोमसोम सडक बनेपछि मुस्ताङ आउने पर्यटकको रोजाइमा मार्फा पर्न थालेको छ।’
चलचित्रले चिनाएको गल्ली मार्फाको बिचमा रहेको ‘जेरी’ गल्लीमा सबैभन्दा धेरै पर्यटकरू झुम्मिएका भेटिन्छन्। जेरी चलचित्र छायाङ्कन भएपछि गल्लीको नाम भक्तिगल्लीबाट जेरी भएको छ। स्थानीयवासीले रङ्गको स्याउको आकृतिको साइनबोर्डमा नाम लेखेर टाँसेका छन्।
भक्तिप्रसाद हिराचनको घर भएकाले भक्तिगल्ली भनिएको चोकलाई भक्तिप्रसाद आफैले जेरी नामकरण गरिदिएका हुन्। ‘साइनबोर्ड राखेपछि यहाँ आउने पर्यटकले फोटो, भिडियो खिच्न, टिकटक बनाउन थालेसँगै प्रचारप्रसार भएको हो,’ भक्तीप्रसादले भने, ‘यस्तो धेरै प्रचार होला र पर्यटक आउलान् भनेर सोचेको थिइन् । अहिले खुसी लागेको छ।’
पर्यटकहरूले हिमाली भेगको पोसाक बख्खु लगाएर मार्फाको पदमार्ग र गल्लीमा तस्विर, भिडियो खिच्ने र सामाजिक सञ्जालमा राख्ने गर्छन्। स्थानीय व्यापारीहरूले बख्खु भाडामा लगाउँछन्। एक पटक बख्खु लगाएको दुुई सयदेखि तीन सय सम्म भाडा तिर्नुपर्छ। यसैगरी याकको डमी पनि राखिएको छ। याकको डमीमा चढेर तस्विर खिचाएको एक सय पचास र सँगै तस्बिर खिचाउँदा ५० रुपियाँ तिर्नुपर्छ।
मुस्ताङ भ्रमणको सम्झनाका लागि हिमाली पोसाकमा सजिएर मौलिक घरहरू भएको बस्तीभित्र तस्बिर र भिडियो खिचाएको विराटनगरबाट आएकी रिमा लुइँटेलले बताइन्।
‘सामाजिक सञ्जालमा जेरी गल्लीको भिडियो देखेपछि कस्तो रहेछ भनेर आएको हो,’ उनले भने, ‘हेर्दा राम्रो मार्फा गाउँ, खाँदा मिठो मार्फा स्याउ भन्ने गीत सुन्दा गरेको परिकल्पना ठ्याक्कै मिल्यो।’
मार्फाका गल्लीहरूको नामकारण
मुस्ताङ भ्रमणमा आउने सबैजसो नेपाली मार्फा घुम्न आउने गरेको घरपझोङ गाउँपालिकाका अध्यक्ष मोहनसिंह लालचनले बताए। यही कात्तिक महिनामा एक लाख १३ हजार पर्यटक मुस्ताङ घुम्न आएका थिए।
पर्यटक आगमन बढेपछि मार्फा गाउँ छिर्नेदेखि बाहिरिने ठाउँसम्म रहेका ११ वटा गल्लीलाई स्थानीय नाम र नम्बरसहितको साइनबोर्ड राख्न लागेको उनले बताए। अध्यक्ष लालचनका अनुसार गल्लीलाई अमरसिङ, लुक्ने, वुद्ध, झाँक्री, धौलागिरी बेसक्याम, हाङ, जेरी, ढाक्रे, कमेडियन, स्ट्रेस फ्रि नामकरण गरिएको छ।
‘विद्युतको तार भूमिगत गरिएको मार्फाको बस्तीभित्र रातमा बत्ती बालेर उज्यालो पारिएको छ,’ उनले भने, ‘पर्यटकलाई सहजताका लागि गल्लीको नामसँगै संख्याको साइनबोर्ड राख्न लागेका हौ।’
संस्कृति र प्रकृतिमा धनी मार्फा
मुख्य पदमार्गमा यसअघि नै ढुङ्गाको छपनी विछ्याइएको छ। स्थानीयले घर अगाडिको पैदलमार्ग सरसफाइ गर्छन्। शाखा पैदलमार्गमा पनि छपनी ढुङ्गा विछ्याउने काम भइरहेको छ। रसिला र स्वादिलो स्याउ उत्पादन हुने मार्फा संस्कृति र प्रकृतिमा धनी छ।
मार्फाका ७९ वर्षीया लालप्रसाद हिराचन संस्कृति र प्रकृतिको धनी मार्फा कृषि पर्यटनको नमूना भएको बताउँछन्। ‘मार्फाको स्याउबारी, थकालीको रहनसहन, जीवनशैली, मौलिक संस्कार, कला संस्कृति, गुम्बा, गुफाले पाहुनालाई लोभ्याउँदै गएको छ,’ उनले भने, ‘मुस्ताङ आउने पर्यटकको बसाइ लम्बाउन र उनीहरूलाई भुलाउन मार्फामा धेरै आकर्षणहरू छन्।’
सेतो र रातो माटोले लिपेका झुरूप्प मिलेका मार्फाका घरमा माटोकै छाना र छानामाथि दाउरा चिरेर राखिएको छ। मार्फालीले शताब्दीआँै अघिको मौलिकता बचाएर राखेका छन् । कालीगण्डकी नदी किनारको फाँटमा स्याउबारीको हरियाली र कुनातर्फ सुक्खा पहाड छ।
वसन्त ऋतुमा स्याउ फुल्दा र शरदयाममा लटरम्म दाना लागेका स्याउको बगैँचा डुल्दा प्रकृतिको काँखमा रमाएको महसुस हुने काठमाडौँबाट मार्फा आएका रामशरण अधिकारीले बताए।
लालचन, हिराचन, ज्वारचन र पन्नाचन थरका थकाली समुदायले बस्ती बसालेको एक सय ५० घरपरिवारको बसोबास रहेको मार्फामा दलित समुदायको पनि बसोबास छ। यहाँका परम्परागत घरमा बिस्कुन सुकाउन र पानी नचुहियोस् भनेर छानाको चारैतिर दाउरा चिरेर राख्ने चलन छ।
मार्फाको शिरमा स्याउ उद्यान निर्माणाधीन छ। जहाँबाट मार्फा गाउँ र स्याउ बगैंचाको दृष्य अवलोकन गर्न सकिन्छ। दर्जनौं स्वदेशी तथा विदेशी चलचित्र छायाङ्कन भएको मार्फाका घरमा स्थानीय पहिचान झल्किने कलात्मक वस्तुहरू सजाइएका छन्।
मार्फाको पश्चिमतर्फको पहाडको भित्तामा प्राकृतिक कलात्मक दृष्य देखिन्छ । सम्तेलिङ गुम्बा मार्फाको धार्मिक सम्पदा हो। गाउँमाथिको पाखामा रहेको करिब तीन सय वर्ष पुरानो भीर गुम्बा अर्को आकर्षण हो । उक्त गुम्बामा विपद् नहोस्, खेतीबाली सप्रियोस् र रोग ब्याधी नआवास भनेर पुजाआजा गर्ने चलन छ।
जापानी भिक्षु तथा अन्वेषक एकाइ कावागुची सन् १८८८ मा बुद्ध धर्मको अध्ययनका लागि तिब्बत जाने क्रममा बसेको घरलाई कावागुची घर नामकरण गरिएको छ। एकाइ कावागुचीलाई नेपाल–जापान सम्बन्धका दूत मानिन्छ।
हिमाली क्षेत्रका फलफूल, तरकारी र खाद्यबालीको अनुसन्धान तथा विकासका लागि मार्फामा शितोष्ण बागबानी विकास फार्म छ। कृषिसम्बन्धी अध्ययन अनुसन्धान र स्याउ बारी अवलोकन गर्न फार्ममा पर्यटक भुल्ने गर्छन्।
देशका विभिन्न ठाउँबाट कृषक समूह र कृषि प्राविधिक अवलोकन भ्रमणमा आउँछन्। शितोष्ण बागबानी विकास केन्द्रको नजिकै मृदी गुफा छ। छोर्तेन आकृतिको गुफामा वौद्ध धर्मगुरू रिम्पोचेको मूर्ति रहेको स्थानीय ज्ञानु पन्नाचनले बताए । स्याउको राजधानीले परिचत मार्फाका स्थानीयको मुख्य आम्दानीको स्रोत कृषि र पर्यटन हो। स्याउ बगैंचाभित्र अन्तरबालीका रूपमा उवा, जौ, आलु, फापर, डाबर, सिमी र तरकारी लगाउँछन्।
मार्फामा छ वटा स्याउको ब्रान्डी बनाउने उद्योग छन्। पर्यटकको सुविधाका लागि मार्फामा २० भन्दाबढी होटेल सञ्चालनमा छन्। मुस्ताङ घुम्न आउने पर्यटकहरूले मार्फाका कोसेली घरबाट स्याउ, सकुटी, दाल, ब्रान्डी किनेर लैजाने गर्छन्।
Add Comment